Hymni in Dominicis

1. Hymnus „Salve dies“

Salve dies, diérum glória,
dies felix Christi victória,
dies digna jugi lætítia,
    dies prima.

Lux divína cæcis irrádiat,
in qua Christus inférnum spóliat,
mortem vincit et reconcíliat
    summis ima.

Sempitérni regis senténtia
sub peccáto conclúsit ómnia;
ut infírmis supérna grátia
    subveníret,

Dei virtus et sapiéntia
temperávit iram cleméntia,
cum jam mundus in præcipítia
    totus iret.

Resurréxit liber ab ínferis
restaurátor humáni géneris,
ovem suam repórtans úmeris
    ad supérna.

Angelórum pax fit et hóminum,
plenitúdo succréscit órdinum,
triumphántem laus decet Dóminum,
    laus ætérna.

Harmoníæ cæléstis pátriæ
vox concórdet matris Ecclésiæ,
« Allelúja » frequéntet hódie
    plebs fidélis.

Triumpháto mortis império,
triumpháli fruámur gáudio;
in terra pax, et jubilátio
    sit in cælis. Amen.
 

2. Hymnus „O lux beáta“

O lux, beáta Trínitas
et principális Unitas,
jam sol recédit ígneus:
infúnde lumen córdibus.

Te mane laudum cármine
te deprecémur véspere;
te nostra supplex glória
per cuncta laudet sæcula.

Christum rogámus et Patrem,
Christi Patrísque Spíritum;
unum potens per ómnia,
fove precántes, Trínitas. Amen.
 

3. Hymnus „Cónditor alme síderum“

Tempore Adventus usque ad diem 17 decembris exclusive.

Qui cóndolens intéritu
mortis períre sæculum,
salvásti mundum lánguidum,
donans reis remédium,

Vergénte mundi véspere,
uti sponsus de thálamo,
egréssus honestíssima
Vírginis matris cláusula.

Cujus forti poténtiæ
genu curvántur ómnia;
cæléstia, terréstria
nutu faténtur súbdita.

Te, Sancte, fide quæsumus,
ventúre Judex sæculi,
consérva nos in témpore
hostis a telo pérfidi.

Sit, Christe, Rex piíssime,
tibi Patríque glória
cum Spíritu Paráclito,
in sempitérna sæcula. Amen.
 
 

 
index hymnorum | index generalis

Compilavit Gregorius Kollmorgen.