Orationes hebdomadæ V temporis paschalis

Dominica V Paschæ:

Deus, per quem nobis et redémptio venit et præstátur adóptio , fílios dilectiónis tuæ benígnus inténde, ut in Christo credéntibus et vera tribuátur libértas et heréditas ætérna . Per Dóminum .
 

Feria II hebdomadæ V temporis paschalis :

Deus, qui fidélium mentes uníus éfficis voluntátis, da pópulis tuis id amáre quod prǽcipis, id desideráre quod promíttis , ut, inter mundánas varietátes, ibi nostra fixa sint corda, ubi vera sunt gáudia . Per Dóminum.
 

Feria III hebdomadæ V temporis paschalis:

Deus, qui ad ætérnam vitam in Christi resurrectióne nos réparas, da pópulo tuo fídei speíque constántiam, ut non dubitémus implénda, quæ te nóvimus auctóre promíssa. Per Dóminum.
 

Feria IV hebd . V temporis paschalis :

Deus, innocéntiæ restitútor et amátor, dírige ad te tuórum corda famulórum, ut, quos de incredulitátis ténebris liberásti , numquam a tuæ veritátis luce discédant. Per Dóminum.
 

Feria V hebd. V temporis paschalis :

Deus, cujus grátia justi ex ímpiis et beáti effícimur ex míseris, adésto opéribus tuis, adésto munéribus, ut , quibus inest fídei justificátio , non desit perseverántiæ fortitúdo. Per Dóminum.
 

Feria VI hebd . V temporis paschalis:

Tríbue nobis, quǽsumus , Dómine, mystériis paschálibus conveniénter aptári, ut, quæ lætánter exséquimur, perpétua virtúte nos tueántur et salvent. Per Dóminum.
 

Sabbatum hebd . V temporis paschalis :

Omnípotens ætérne Deus, qui nobis regeneratióne baptísmatis cæléstem vitam conférre dignátus es, præsta , quǽsumus, ut, quos immortalitátis éfficis justificándo capáces, usque ad plenitúdinem glóriæ , te moderánte , pervéniant. Per Dóminum .
 
 

hebdomada præcedens | index orationum | hebdomada sequens

Compilavit Gregorius Kollmorgen.